Ginkumpirma it Bureau of Internal Revenue (BIR) Aklan nga naga-sunod sa fuel marking program ro mga gasolinahan sa probinsya it Aklan, base sa ginpatigayon nga random testing it ahensya.
Suno kay Revenue District Officer Dino Somera, tuyo it fuel marking program nga masigurado nga nababayran ro tamang excise tax sa gasolina, diesel ag kerosene.
Parte raya it pinag-ibang operasyon it BIR ag Bureau of Customs agud malikawan ro pagpuslit it produktong petrolyo ag maprotektahan ro mga lehitimong negosyante ag bumaeakae.
Paathag ni Somera, kun madakpan ag mapamatud-ang illegal ro ginabaligya nga mga produktong petrolyo, posibleng selyuhan ro mga fuel pump ukon depot, magabayad it kueang nga buwis, ag indi makabaligya hasta indi maselyuhan ro produkto.
Ginklaro man nana nga uwa it epekto ro programa sa presyo it gasolina bangud dapat nga nabayaran eon ro excise tax sa oras it pag-import ukon pag-buoe it suplay halin sa depot.
Samtang, nakumpiska it BIR ro 18 bukon it rehistradong point-of-sale (POS) machine halin sa kapin sa 350 yunit nga ginusisa sa Aklan.
Posible man nga papanaugan ro mga nag-eabag it compromise penalty nga ₱25,000 kada makina, mageuwas pa sa posibleng kueang nga buwis ag iba pang nagakaigong saeabton.
