Eowas nga kaunon ro mga gina-harvest nga isda ag taeaba halin sa katubian nga sakop it banwa it New Washington suno kay Mayor Jessica Panambo.
Apang, agud nga makasigurado, nagpaguwa anay it executive order ro alkalde nga ginabawae ro pag-harvest sa mga natumod nga lugar nga nakitaan it nagtagas nga langis.
Raya hay samtang owa pa nakapaguwa it resulta ro Bureau of Fisheries and Aquatic Resources ukon BFAR halin sa andang ginkolekta nga water sampling.
Gindugang pa it alkalde nga owa it peligro nga kaunon ro mga isda ag taeaba nga halin sa ibang parte it andang banwa mag-eowas sa mga barangay nga maeapit sa Metallica Shipyard sa Barangay Polo sa ginhalinan it oil spill.
Ginpasiguro man ni mayor panambo sa mga residente ag mga mangigisda nga indi magkabaeaka bangud nga magatau it nagakaigo nga bulig ro LGU, kamana man danyos ro tag-ana it power barge ag shipyard sa mga naapektuhan it oil spill sa Lagatik River.
Sa pihak nga parte, kontrolado eon suno kana ro nagtagas nga lube oil.
Raya hay kasunod it ginpatigayon nanda nga ocular inspection kaibahan ro BFAR, Municipal Agriculture Office, Municipal Environment and Natural Resources Office ukon MENRO, New Washington PNP, ag Philippine Coast Guard.
Angot kara, nagpasa eon man sanda it report sa office of civil defense kun sa siin padayun ro andang hugut nga pagmonitor sa sitwasyon agud nga masiguro ro kaeowasan ag kamaeayran it mga pumueuyu ag palibot.
Kadungan kara, ginpasaeamatan it alkalde ro mga tanan nga nagbulig sa madasig nga pag-contain it nagtagas nga langis umpisa ko domingo nga adlaw partikular ro PCG nga nagpadaea it 15 nga mga tawuhan dugang pa ro 115 nga volunteer workers.
Nagtau man it dugang nga limang segment it spill boom ro Coast Guard Sub-station Boracay.
