KALIBO, Aklan—Kabilugan nga naging malinong ag matawhay ro selebrasyon it paskwa sa bilog nga probinsya it Aklan.
Apang, ginpahayag ni P/Capt. Aubrey Ayon, tagapaghambae it Aklan Police Provincial Office nga may inde malikawan nga reported isolated cases nga ro mga imbolbado ag makabig nga suspek hay arestado.
Sa pihak kara, naging maayos ro pangkabilugan nga selebrasyon kon sa siin gintutukan it husto it kapulisan ro mga places of convergence kaparehas it simbahan, tindahan, terminals ag iba pang lugar nga gindayo it mga tawo.
Ro pagbantay ag monitoring it pulisya hay magapadayon hasta sa pagsug-aeaw it bag-ong dag-on.
Samtang sa pihak nga parte, maskin nga ginakabig nga insurgency free ro bilog nga probinsya, naging alerto gihapon ro kapulisan sa naging anibersaryo it Communist Party of the Philippines – New People’s Army ukon CPP-NPA kahapon nga adlaw it Huwebes, Disyembre 26.
Sa makaron suno kay P/Capt. Ayon hay pagaeauman ro uman nga paglibot it mga kapulisan kaibahan ro Bureau of Fire Protection sa mga natungdan nga banwa agud nga usisaon ro mga baealigyaan it paeopok.
Angot kara, uman nga nag-apela sa publiko ro pulisya nga likawan ro mga illegal nga paeopok bangud sa posibleng makahalit raya sa kabuhi ag pangabuhian it tanan.
