KALIBO, Aklan — Ginpasiguro it pamunuan it Philippine Coast Guard (PCG)-Aklan nga pagataw-an it nagakaigong aksyon ro reklamo it mga mangingisda halin sa Cebu matapos nga gina-alegar nga ginkotongan ro mga raya it P5,000 it mga miyembro it PCG.
Suno kay Lt. Commander Marlowe Acevedo it PCG-Aklan station commander nga haum imaw nga makipag-istorya sa mga complainant ag mas makapamayad nga magsumiter ro mga raya it affidavit of complaint para may basehan sa andang imbestigasyon.
Ginpahayag dugang nga maskin sin-o hay pwede nga magpasibangod apang kinahang-ean nga ipaagi sa proseso ro tanan.
Sa oras suno kana nga mapamatud-an nga may anomaliya sa anang taeatapan, ginpasiguro kara sa mga complainant nga magapanabat ro gina-alegar nga miyembro it PCG.
Ginpaathag kara nga ro tanan nga fishing boat antes nga mag-eayag hay kinahang-ean nga may permiso halin sa PCG kon ro mga raya hay may ginabuytan nga nagakaigong dokumento.
Apang kon uwa sanda it clearance hay posible nga uwa sanda it permit ag naga-eayag nga uwa sanda it kasayuran.
Nasayuran nga base sa reklamo it mga mangingisda nga sakay it fishing vessel nga MBCA Jonas kaibahan ro andang carrier ukon baroto nga ginakargahan it mga dakop nga isda nga samtang nagapa-agto sa Palawan halin sa Cebu hay nasamaran sanda it makina sa baybayon nga sakop it Caticlan, Malay, apang bangud nga mabaskog ro humbak hay nagdungka sanda sa bahin it Pakilawa, Nabas.
May gulpi sigon nga nag-abot nga pick-up nga saeakyan nga may pangaean nga Philippine Coast Guard ag ginkutana sanda kon may clearance, apang kat gin-insister nanda nga na-stranded sanda sa lugar hay ginpangayuan sigon sanda ko una it P10,000 nga ko ulihi hay nagnaba sa P5,000.
Bangud kara, napilitan ro andang kapitan nga si certain Nelson nga magbayad.
Samtang, gindaea sigon nanda sa banwa it Kalibo ro andang injection pump agud nga ipaayos nga pamatuod nga nasamaran gid man sanda it makina.
