KALIBO, Aklan–Bilang sabat sa mga reklamo angot sa pagiging bayolente it pilang mga mentally challenged persons ukon mga tawo nga may diperensiya sa paminsaron nga nagawinarang sa banwa it Kalibo, gin-report it Kalibo Municipal Police Station nga sanda hay naka-rescue it limang katawo sa andang ginpatigayon nga operasyon kaibahan ro lokal nga gobyerno it Kalibo, Department of Social Welfare and Development ukon DSWD ag iba pang natungdan nga ahensiya it gobyerno.
Suno kay P/Major Frenzy Andrade, hepe it Kalibo Municipal Police Station nga sa nasambit nga numero, ap-at kara ro akeanon ag sambilog ro taga-Las Piñas nga babaye nga kan-o eamang hay nagpanghaboy it gunting sa sangka estudyante sa Mabini Street, Kalibo nga nag angkon it nina sa anang likod.
Ginasugid nga ro nasambit nga babaye hay gindaea dati it sangka foreigner sa isla it Boracay ag naeakot sa paggamit it illegal nga droga hasta nga nakaangkon it problema sa paminsaron.
Samtang, pinaagi sigon sa programa it LGU-Kalibo, nakataeanang igabiyahe ro mga raya paagto sa mental hospital sa Manila.
Tuyo it nasambit nga tikang it gobyerno nga masabat ro isyu angot sa mental health.
Angot kara, nagpaandam si Major Andrade nga likawan eon ro paggamit it illegal drugs bangud nga maabu eon nga mga indibidwal ro nasamad ro kabuhi bangud sa nasambit nga bisyo.
