Ginpahayag ni Ka Leody De Guzman, national president it Partido lakas ng Masa (PLM) nga parte it drama sa tunga it mga Marcos ag Duterte ro mga nagakatabo sa Senado makaron.
Suno kana, indi mabasoe ro pumueuyo nga dudahan ro nagtuhaw nga barilan sa Senado ku adlaw it Myerkules, Mayo 13.// raya sigon hay tuga it padayon nga pag-agawan it daywang administrasyon sa pwesto.
Paathag nana, nagaguwa nga gin-gamit eamang ni Senate President Alan Peter Cayetano si Senator Ronald ‘Bato’ Dela Rosa para nga mabuoe ro insaktong numero para nga imaw hay mailihir sa nasambit nga pwesto.// posible sigon nga ro kabaylo kara hay promisa nga proteksyon sa Senador.
Pagkatapos nga mailihir bilang Senate President, posibleng ginpatakas eon ni Cayetano si Bato bangud nga tapos eon ro anang obligasyon, sa pihak nga nagpromisa raya nga ipaidaeom sa kustodiya it senado ro senador.
Nagampanan eon sigon ni Bato ro anang obligasyon base sa request ni Cayetano ag masadya eon sanda, pati ro mga tagasuporta it pamilya Duterte, bangud nga nabayluhan eon nanda ro liderato ag nakikit-an nanda nga mapunggan eon ro pag-hueag it impeachment case ni Vice President Sara Duterte.
Ginpunto man ni Ka Leody nga mabahoe ro magiging epekto it pagbag-o it mayorya sa impeachment case.
Suno kana, mabahoe ro potensyal nga makaeuwas sa mga nasambit nga kaso ro bise presidente bangud nga haeos tanan nga naka-pungko sa ginaeaumang magiging impeachment court hay kaalyado nana.
Ginengganyo man nana ro publiko nga dapat indi magpadaea-daea sa mga drama nga ginahimo it gobyerno bangud raya hay kontrahan it daywang dinastiya para nga magpabilin sa pwesto ag padayon nga mag-hari sa nasyon.
