KALIBO, Aklan—Bumuhos ro mga naghingabot sa voter’s registration sa mga taeatapan it Commission on Elections (COMELEC) partikular sa banwa it Kalibo sa gintaeanang deadline makaron nga adlaw it Sabado, Setyembre 29, 2018.
Nauna kara nga ginhambae it COMELEC nga uwa it extension nga matabo sa pagpa-rehistro agud mataw-an it kahigayunan nga makaboto sa 2019 May mid-term election.
Suno kay COMELEC-Aklan Spokesperson Crispin Raymund Gerardo nga dapat likawan it mga botante nga mag-eagas sa ulihing adlaw it registration agud malikawan ro pakikipagdueotdutan sa iba pang naga-eagas nga makaparehistro.
Dugang pa kara nga uwa it rason para mag-eagas sa ulihing oras nga gintaeana it ahensya bangud nag-umpisa ro voters registration kato pang Hulyo 2, 2018.
Bukas sigon ro mga opisina it COMELEC hasta alas-5:00 it hapon kaina.
