Mga nagpalista agud nga mabakunahan kontra COVID-19 sa Aklan, naga-abot eon sa masobra 150-K

KALIBO, Aklan—Naga-abot eon sa 150,893 nga mga residente ro nagpalista agud nga mabakunahan kontra COVID-19 sa probinsiya it Aklan.

Suno kay Dr. Cornelio Cuatchon it Provincial Health Office ukon PHO-Aklan nga raya hay base sa andang masterlists it covid 19 vaccination summary hasta ko Hunyo 27, 2021.

Base sa datos, 30,018  ukon  19.89% ro nabakunahan it unang dose samtang 10,019  ukon 7.24% ro nakabaton it 2^nd dose  halin sa A1, A2 ag A3 nga priority groups.

Naga-abot man sa 82.83% nga frontliners ro nabakunahan it 1^st dose samtang ro fully vaccinated hay 63.10%.

Sa pihak nga parte,  ro mga senior citizens nga nakabaton it 1^st dose hay 27.31% ag ro 2^nd dose hay 4.07% samtang ro mga adult nga may comorbidity hay 14.60% ro nabakunahan it unang dose ag 0.02% ro 2^nd dose.

Antes sigon nga makaderetso sa A4 ukon nga essential workers  ukon economic frontliners hay dapat nga maka-abot anay  sa 70% ro mabakunahan sa A1, A2 ag A3 groups.

Ginaeauman suno kay Dr. Cuatchon nga magadere-deretso eon ro andang pag rolyo it mga bakuna makaron nga hulyo ag agosto sa pag-abot it bulto it mga bakuna sa nasyon.