Inumpisahan eon it Department of Education ro pagguwa sa mga nalumang laptop halin sa mga bodega kara para sa ditso nga distribusyon sa nagkaeain-eain nga opisina kara.
Suno kay Department of Education (DepEd) Secretary Juan Edgardo Angara, masubra 50% eo it mga laptop nga nakatambak sa mga warehouse it ahensiya ro ginpaguwa samtan ro iba hay padayon pang ginaayos para sa direktang pagdaea sa nagkaeain-eain nga lokasyon.
Ginpangayo eon man sigon it DepEd ro bulig it Philippine Air Force para mabiyahe ro mga raya paadto sa maeayo nga lugar samtang pilang mga local government unit eon man ro nag-siungbil it bulig para sa pagbibiyahe sa mga computer agod maitao eon sa mga opisina it DepEd ag mga eskwelahan.
Una eon nga ginhambae ni Sec. Angara nga masubra-kumueang sa 1.5 million unit it mga laptop ag iba pang mga kagamitan ro nakatambak eamang sa bodega kara. Ro mga raya hay halin pa ko tyempo ni dating Secretary Leonor Briones ko 2020 hasta 2021. Suno sa opisyal, kanahang ean dalion eon ro distribusyon it mga mismong laptop bangod sa may mga lifespan raya.
Bangod sa mabuhay eon nga tyempo nga nakatambak raya sa bodega, mahimo nga maeampasan eon ro lifespan. Aminado man ro opesyal nga ro mga mismong laptop hay pareho nga mga ‘outdated’ eon apang nagahimo sigon it pamaagi ro Information and Technology team it DepEd agod nga magamit pa ro mga raya.
