KALIBO, Aklan — Igapaidaeum sa inspeksyon it Department of Interior and Local Government ukon DILG-Aklan ro tanan nga mga nalimpyuhan eon nga pampublikong karsadahon sa anuman nga obstructions ukon sagabal.
Raya hay kasunod it ginpaguwa nga Memorandum Circular No. 2019-121 nga nagataeana it deadline sa pagsunod sa mandu ni Pangueong Rodrigo Duterte.
Ginpahayag dugang nga kada Biyernes nga adlaw hay nagasumite it report sa taeatapan it DILG ro tanan nga mga local government units ukon LGUs sa Aklan angot sa ginapatigayon nanda nga clearing operations.
Apang raya sigon hay andang gina-validate agud nga matumod kon may kamatuoran .
Gin-engganyo man it DILG ro tanan nga mga public officials nga engkaso nga may mga pag-eabag, dapat nanda nga pangunahan ro demolisyon agud nga maging mayad nga halimbawa sa iba.
Madumduman nga ro tanan nga mga LGUs hay obligado nga limpyuhan sa andang nasakupan ro mga public roads sa anuman nga obstructions kaibahan ro mga illegal nga naka-parking nga mga saeakyan, sidewalk vendors, barangay outposts ag iba pa.
Padayun ro pagtinguha makaron it kada banwa partikular ro Kalibo sa clearing operations agud nga maka-eagas sa deadline nga 60-day period nga nag-umpisa ko Hunyo 29 ag magatapos sa Setyembre 29.
Mag-eowas sa mga sabeag sa daeanon, ginapangkakas man makaron ro mga kable ag linya it mga telcos nga owa eon ginagamit.
Ro sin-o man nga alkalde nga indi makasunod sa deadline hay ginasugid nga magapangatubang sa nagakaigo nga sanction ukon penalidad .
