KALIBO, Aklan–Ginaproblema makaron ro mga pamatan-on nga nagatambay, nagasinangag ag nagapangmalit nga nagatuga it disturbo sa mga residente ag mga motorista nga naga-agi sa barangay Andagao, Kalibo.
Suno kay Linda Cuaterno, sangka senior citizen ag residente sa lugar nga mag-eowas nga nagatuga it sangag hay nagapangmalit pa ro mga raya.
Ginatantiya nga pito hasta waeo nga katawo ro nagatililipon sa lugar nga kun amat hay gina-abot it paka-aga ro andang pagsinangag.
Kaeabanan sigon sa mga raya hay mga taga-ibang lugar.
Maskin sigon ro guwardiya it warehouse it sangka softdrinks hay nagadumot man kanda bangud sa gina-obra nga pagpangmalit.
Angot kara, ginahinyu nanda sa barangay council nga i-demolish eon ro waiting shed nga ginatambayan it mga pasaway nga pamatan-on kun sa siin pila sa mga raya hay mga menor de edad.
Ginpahayag dugang nga gina-report nanda sa pulis ro insidente, apang sa andang pagresponde hay nagadaeaeagan ro mga raya.
Kon ginasita hay sanda pa suno kana ro akig ag nagapamuyayaw.
Ginsuhestiyon man nana nga dapat nga hugut nga ipatuman ro curfew sa mga pamatan-on ag magbutang it barangay tanod sa lugar.
Angot kara, sangka residente pa ro nag post sa social media it andang reklamo sa nasambit nga mga pamatan-on.
Suno kay Noemi Cuescano nga ro anang post hay umani it nagkaeain-eain nga reaksyon nga kaabuan sa nag-comment hay mga taga-Andagao nga nagapabutyag nga sakit it ueo ro nasambit nga mga pamatan-on sa andang lugar.
