KALIBO, Aklan — Plano makaron ni Kalibo reelected Sangguniang Bayan member Ronald Marte nga uman nga pukawon ro atensyon it mga barangay angot sa andang kampanya kontra sa mga pasaway nga mga pamatan-on.
Raya hay kasunod it insidente it vandalism sa Brgy. New Buswang, Kalibo, kun sa siin, ginpinturahan ro pilang saeakyan, gate ag maskin ro pader it sangka baeay.
Pinaagi sa backtracking it mga CCTV footages, nadiskubrehan nga ro may kahimuan kara hay ro grupo it mga pamatan-on.
Ap-at ro menor-de-edad ag sambilog ro 19-anyos nga puro mga residente it Brgy. Old Buswang, Kalibo.
Paga-engganyuhon sigon nanda ro tanan nga mga barangay council nga mag-install it mga CCTV cameras sa mga strategic nga lugar ag engkaso nga owa it nagakaigo nga pondo hay posibleng paga-ayudahan sanda it lokal nga gobyerno it Kalibo sa idaeum it Municipal Peace and Order Council.
Ginpahayag dugang nga maskin may mga pamatan-on nga nadadakpan it mga pulis nga eakot sa krimen, apang ginaturn-over eamang sanda sa MSWDO para sa counselling ag indi man makasuhan bangud nga sanda hay ginakabig nga Children in Conflict with the Law (CICL).
Sa makaron hay may naga-eksister nga national law angot sa curfew hours sa mga pamatan-on rason nga dapat nga hugut ro implementasyon kara.
Sa pihak nga parte, padayun man sigon ro mga programa it TESDA para sa mga out of school youth nga gustong uman nga magbalik sa pag-eskwela agud nga maka-usoy it establi nga trabaho.
Apela man nana sa mga ginikanan nga alagaan ag indi pagpabay-an ro andang mga unga agud nga indi magtaeang it daean nga paga-agihan.
