Kalibo Aklan —– Nakwartahan it gobyerno it Dilbeek, Belgium ro pasaway nanda nga mga pumueoyo.
Raya hay matapos nga nagbayad sanda it mabahoe nga multa bangud sa pag-eabag sa ginapatuman nga polisiya matapos nga ginpaidaeom sa light lockdown ro bilog nga nasyon bangud sa paeag it 2019 coronavirus disease (COVID-19)pandemic.
Suno kay Bombo International Correspondent Mercy Villanueva, tubong Brgy. Sibaliw, Banga apang presenteng naga-istar sa nasambitang nasyon nga uwa ginseryoso it mga pumueoyo ro anunsyo it gobyerno kon sa siin nahimo pa it mga raya nga magpa-party sa sueod it andang tagsa ka panimaeay.
May kaangtanan kara, kapin sa 37,000 ka mga tawo ro nadakpan it mga otoridad kon sa siin ro tag-iya it baeay hay ginpamulta it 750 Euro samtang ro mga bisita hay ginpamulta it 250 Euro kada isaea.
Sa pihak nga light lockdown eamang ro ginpatuman it gobyerno, ginpasarado ro mga negosyo ag iba pang kumpanya nga uwa naga-provide it essential goods ag essential services.
Hugot man suno kana nga ginapatuman ro social distancing ag ro stay at home policy agud nga indi eon magkalhit pa ro makamaeatay nga virus.
Sa makaron sigon hay amat-amat eon nga nakontrol ro curve it virus kon sa siin ro Belgium hay nakalista it 41,889 nga total cases it mga tinamaan it virus.
Sa nasambitang numero, 6, 262 kara ro namatay samtang 9, 433 ro nakarekober matapos ro pagbueong ag quarantine procedure.
