KALIBO, Aklan—Ginkumpirma it Commission on Elections ukon Comelec-Aklan nga limang banwa sa probinsiya it Aklan ro nakabaton it petisyon para sa diskwalipikasyon it pilang mga botante.
Raya hay ginaeakipan it Batan , New Washington, Numancia, Makato ag Tangalan.
Suno kay Comelec Aklan spokesperson Chrispin Raymund Gerardo nga raya hay kasunod it ginpatigayon nga election registration board ukon ERB hearing umpisa ko Hulyo, Agosto, Setyembre ag Oktubre.
Kaeabanan sa mga petisyon hay angot sa pagiging non-resident, kun sa siin, pila sa mga raya hay nagparehistro bilang transferee ag bag-ong registrant.
Gina-alegar it pilang oppositor nga nataeupangdan ro pagtaas it numero it mga bag-ong registrants ag transferee nga ginadudahan nga pila kanda hay bukon it residente it andang barangay ukon banwa .
Samtang, gindugang pa ni Gerardo nga pila man sa ginpasaka nga petisyon hay gin-atras ukon gin-withdraw .
Engkaso nga makaangkon it mabakod nga ebidensiya, indi pagapasugtan nga makaboto ro mga new registrants samtang ro mga transferee hay igabalik sa andang dating barangay ukon banwa agud nga idtu makaboto.
Ginpasalig man nana nga ginahimo it ERB board ro tanan agud nga maging patas ro paghusga ag maid-id nga pag-estudyo sa mga petisyon ag mga sabat.
Ro ERB board hay ginaeakipan it comelec officer bilang chairman ag ro mga miyembro hay ro DepEd Aklan supervisor ag head it civil registrar office.
