-- ADVERTISEMENT --

NATIONAL News —  Gin-engganyo it  Commission on Filipino Overseas (CFO) ro mga Filipino nga kasado ukon  engaged sa mga dumueuong nga pumueuyu nga mag-agi sa government counseling program agud nga mabuligan sanda nga magpahaum sa andang bag-ong palibot.

Ro padumdum hay kasunod it trahedya it kaso ni Marvil Facturan-Kocjan, nga gina alegar nga pinatay it anang Slovenian nga asawa.

Ginpamilit man it CFO ro importansiya it  Guidance and Counseling Program (GCP), nga nagatuyo  nga siguraduhon ro kamaeayran ag proteksyon it mga Filipino nga maga-asawa it dumueuong.

-- ADVERTISEMENT --

Nagatau ro programa it importanteng impormasyon ag mga gamit agud nga mabuligan ro  mga migrante it kasae nga maghanda para sa mga potensyal nga peligro kapareho it pagkaiba sa kultura, sabeag sa lenggwahe, kinagamo sa sueod it baeay ag human trafficking.

Ro mga Filipino nga plano nga mag-asawa it dumueuong ag mag istar sa ibang nasyon hay kinahangean nga magparehistro ag magsunod sa mga kinahangeanon it  CFO bilang kaparte it andang exit clearance halin sa immigration it Pilipinas.

Tuyo it programa nga mapataas ro kasayuran angot sa  mga hangkat nga pwedeng paga-atubangon it mga migrante sa andang destinasyon, agud nga masiguro ro andang kaeowasan ag kamaeayran.

Maskin nga bukon it obligadong mag-agi sa GCP ro mga turista kapareho ni Marvil, posibleng raya hay nakabulig sa anang kaso.

Sa tiempo it programa, gina-usisa it  mga counselor ro criminal record it foreigner nga  asawa ag kun kinahangean, ginarekomenda ro dugang nga  counseling.

Ginkundina man it CFO ro pagkamatay ni Marvil ag  nagbulig sa  pag-repatriate it anang eawas halin sa  Slovenia, kabulig ro  Philippine Embassy sa Vienna.