KALIBO, AKLAN — Umpisa sa Hunyo 15, 2017 hay igapatuman eon it LGU-Malay ro 5-year old nga laye nga nagabawae sa paggamit it plastic kapin eon sa isla it Boracay.
Ro municipal ordinance no. 320-2012 hay nagatuyo nga mabawasan ro paggamit it plastic.
Sa idaeom it ordinansa, hugot nga ginabawae ro paggamit ag pagbaligya it plastic bag sa mga dry goods ag mabawasan ro paggamit kara sa mga wet goods.
Bawae eon man ro paggamit it styrofoam.
Ginaengganyo ro paggamit it mga reusable bags, woven bags, cloth bags, paper bags ag iba pa nga human sa mga biodegradable materials.
May nagakaigong multa nga nagaabot sa P1,000 hasta P2,500 ukon pagkakulong it sang buean hasta an-om nga buean sa sin-o mang magaeabag.
Mag-eowas dikara, posible pa sigon nga makansela ro operasyon it sangka establisimento komersiyal nga magaeabag sa laye.
Ginapatihan nga makabulig ro ordinasa sa problema sa basura sa isla it Boracay.
