KALIBO, Aklan–Ginapanan-aw makaron it pilang eksperto nga maabu nga mga Republican candidate ro magadaog kamana man nga mabuoe nanda ro mayorya sa House of the Representatives it Amerika sa nagapadayun nga midterm elections.
Sa bahin man it Senado, posibleng 50 sigon ro magadaog nga Republican ag 48 sa bahin it Democrats samtang ro daywa nga nabilin hay indi pa masayuran kung siin magapabor.
Pag-abot man sa mga gobernador, 28 ro ginapanan-aw nga maadto sa Republican ag 22 eamang sa Democrats.
Suno kay Bombo International Correspondent Pinoy Gonzales it Texas, USA nga nagsarado eon ro mga polling precinct sa bilog nga nasyon ag pilang oras eon lang ro pagahueaton agud nga masayuran kung sin-o ro magapangibabaw.
Sa makaron, nakabantay sigon ro bilog nga nasyon sa magiging resulta it midterm elections.
Nasayuran nga kinahang-ean makabuoe it 280 seats para mabuoe ro majority sa House of the Representatives.
Gin-insister pa ni Gonzales nga maabu ro nadismaya sa presenteng pagdumaea it mga Democrats sa nasyon bangud owa it natabo nga manami sa andang ekonomiya halin sa tatlong sanga it gobyerno kung siin sa pagpungko ni President Joe Biden hay nag-umpisa ro pagtaas it presyo it langis ag inflation kamana man ro iba pang mga problema.
