KALIBO, Aklan — Haum eon ro kapin sa 2,836 nga mga pampublikong eskwelahan sa bilog nga Western Visayas sa uman nga pagbukas it klase sa Lunes, Hunyo 16.
Raya ro ginpahayag ni Department of Education (DepEd Region 6) spokesperson Hernani Escullar Jr.
Suno kana nga Hunyo 16 ro opisyal nga pag-umpisa it school year 2025-2026 para sa tanan nga mga public schools sa nasyon.
Ginpahayag pa ni Escullar nga mag-eowas sa paglimpyo sa mga classrooms ag bilog nga eskwelahan, naging prayoridad man sa ginpatigayon nga Brigada Eskwela ro literacy ag numeracy campaign sa mga eskwelahan.
Bangud kara, gin engganyo sigon nanda ro mga stakeholders nga mag donar it mga learning kits ag learning resources.
Sa makaron hay activated eon man ro Oplan Balik Eskwela help desk it DepEd agud nga masayuran ro mga suggestions , comments ag reklamo it mga ginikanan ag iba pang stakeholders.
Ginaboeobanta nga masobra sa 1.1 milyon nga mga learners ro andang ginaeauman makaron nga school year.
Apang ro importante suno kana nga ro tanan nga mga inunga nga naga edad it lima hasta 18 anyos hay kinahangean nga makapa-enroll bangud nga libre ro ginatanyag nga edukasyon it DepEd.
Samtang, base sa pinaka-ulihi nga national school building inventory, naga abot sa kapin sa 58,756 nga classroom sa bilog nga Western Visayas nga kon pagasumahon hay bukon it bastante ag masyadong kueang para sa numero it mga estudyante.
