NATIONAL News — Nagpatigayon it inspeksyon ro kapulisan sa mga cellphone it andang linya matapos mabalitaan nga pilang pulis ro na-adik sa online gambling and betting.
Sa Facebook post it Bulacan Police Provincial Office, ginpangunahan mismo nanday PLTCOL Allan Palomo, DPDA ag PLTCOL Laurente Acquiot, DPDO sa idaeum it pagdumaea ni PCOL Satur Ediong ro inspection sa mga cellphones it mga pulis sa nasambit nga probinsiya.
Base sa post, owa it ginpili ro inspection bangud nga maskin ro mataas nga opisyal ukon mga hepe kaibahan ro andang mga tawuhan hay owa ginpa-eampas it ginpatigayon nga inspeksyon.
Ginasugid nga ro nasambit nga tikang hay agud nga malikawan nga ma-adik ro pila sa andang linya sa online gambling ag mawad-an it sweldo sa ulihi hasta nga posibleng mainvolved sa krimen.
Owa man nakitaan it online gambling and betting sa inspeksyon it mga cellphone it mga pulis sa nasambit nga kampo it kapulisan.
Nasayuran nga ro nasambit nga direktiba hay sandig sa kagustuhan ni Chief PNP Police General Francisco Marbil nga duea-on ro iligal nga aktibidades sa andang linya kon may una man.
Ginasugid nga maabu nga milyonaryo ro na-adik sa online gambling kapareho it scatter ro nag-pobre ko ulihi.
