KALIBO, Aklan—Naka-self quarantine eon makaron ro mga pumueoyo it Daegu City ag Cheongdo County North Gyeongsang Province sa South Korea.
Suno kay Bombo International Correspondent Norma Bonifacio-Macquait, tubong Brgy. Cortes, Balete apang presenteng naga-istar sa Daegu City, South Korea nga inde eon sanda pwede magguwa kasunod it nagapadayon nga pagtinaas it kaso it coronavirus disease ukon COVID-19 sa nasambitang lugar.
Ginpahayag dugang nga 99 percent it mga restaurants, shopping malls ag iba pang commercial establishments hay nakasarado eon bangud nga uwa eon it mga customers nga nagasueod.
Sa sueod it daywang adlaw hay nagkaubusan ro mga nagapangunang baeak-eon sa mga groceries stores, supermarkets ag pharmacy tuga it pagpanic buying it mga tawo.
Ro pagkalhit it virus sa andang lugar hay nagtuga it kahadlok rason nga maskin ro pagbisita sa andang mga himata hay uwa eon nanda gina-obraha partikular ro pag-istorya.
Ro communication eon lang sigon makaron it kada isaea hay pinaagi sa social media agud nga uwa it personal contact nga matabo.
Maskin ro mga eskwelahan sa lugar hay nakasarado eon rason nga online ag home schooling makaron ro mga estudyante agud nga makalikaw sa makamaeatay nga sakit.
Ginpahayag dugang nga kanya-kanya eon lang nga diskarte ro mga tawo kon sa siin kaeabanan kanda hay naga self medication eon lang hasta nga magmayad agud nga inde makasueod sa ospital nga maabong pasyente nga tinamaan it COVID-19.
Si Macquiat hay nakapangasawa it amerikanong soldado nga presenteng naka-assign sa Daegu City ag nakaangkon sanda it daywang ka mga onga.
