KALIBO, Aklan—Pilang puno nga nagkaeatumba sa karsadahon ro nailistang kahalitan sa probinsiya it Aklan sa pagpanaeasa it bagyong Kristine nga nagtuga it mabaskog nga hangin ag uean.
Suno kay Garry Vilmar Taytayon it Provincial Disaster Risk Reduction and Management Office ukon PDRRMO-Aklan nga insigidang nag-agto sa Gibon, Nabas ro mga katapo it MDRRMO agud nga magpatigayon it cutting ag clearing sa natumba nga puno.
Mag-eowas kara, nakalista man it kaparehong insidente sa banwa it Lezo , apang owa man it tawo, saeakyan ukon panimaeay nga naapektuhan.
Nagtuga eamang sigon raya it delay sa pilang naga-agi nga saeakyan ag matapos nga malimpyuhan ro apektadong karsada ag mabo-oe ro mga natumba nga puno hay balik eon sa normal ro pagbiyahe .
Dugang pa ni Taytayon nga owa man sanda it nailistang mga pumueuyu nga nag-evacuate.
Angot kara, ginlaygayan nana ro mga residente nga naga-istar maeapit sa mga coastal areas ag mga nabukid nga portion bangud sa peligro it pagbaha ag landslides.
Samtang, sigidas suno kana ro andang komunikasyon ag koordinasyon sa mga banwa para sa iba pang posibleng incident report.
