KALIBO, Aklan–Naga-apela makaron it bulig ro mga residente sa bahin it Sitio Libtong, Brgy. Estancia, Kalibo matapos nga eubog gihapon sa baha ro pilang porsyon it lugar.
Suno kay Teresita Dalida nga hasta makaron hay owa pa nagahubas ro tubi-baha tuga it mga pag-uean ko nagtaliwan nga dominggo kadungan it pagpanaeasa it bagyong Paeng.
Nagapanawagan man raya sa mga natungdan nga mabutangan it maayos nga drainage system ro lugar agud nga may maagyan ro tubi paadto it suba.
Naipaabot eon sigon nanda ro problema sa andang barangay apang hasta makaron hay owa pa it naging aksyon.
Nagakabaeaka sigon sanda para sa andang ikaayong eawas kung siin ginaean-ag eon ro andang mga siki bangud sa pag-eusob sa tubi-baha.
May kaangtanan kara, ginpaathag man it sambilog pang residente nga si Teresa Fernandez nga umpisa nga ginpaderan ro sangka lote ukon ro ginatawag nanda nga “Villa Emilla” hay owa eon it gina-eapsan ro tubi kada naga-uean.
Nagakahawag sigon sanda kada naga-uean bangud sa posibleng pagtaas it tubi eabi pa ag maabu nga mga unga sa andang lugar.
Sa anda sigon nga pagkasayod hay may tamburong eon nga ginpahaum apang owa pa maplastar bangud ginatun-an pa kun siin raya paga-paeapson.
