KALIBO, Aklan — Nagpaabot it pagpasaeamat ro mga apektadong residente it Brgy. Cawayan, New Washington sa Bombo Radyo, lokal nga gobyerno it New Washington ag barangay council sa madasig nga pag-aksyon sa andang ginaproblema nga stagnant water sa andang lugar .
Partikular nga nagpasaeamat si Mrs. Jeneth Ibabao kay New Washington Mayor Jessica Panambo ag Punong Barangay Clyde Custodio bangud sa pag-ulikid sa andang kahimtangan.
Nasayuran nga nagpadaea it backhoe ro LGU-New Washington, adlaw it Biyernes.
Nauna eon nga ginpahayag ni Mrs Ibabao nga gusto eamang nanda nga maaksyunan eagi ro problema bangud sa pagkabaeaka sa ikamayad nga eawas it andang mga inunga partikular sa sakit nga dengue ag leptospirosis.
Makaeoeo-oy man sigon ro kahimtangan it mga estudyante ag iba pang mga residente bangud nga napipilitan nga mag-ubog sa stagnant water hasta nga maka-abot sa karsada.
Mabuhay eon sigon nanda raya nga ginaproblema ag naipaabot eon man sa dating opisyal it barangay apang uwa man it ginhimo nga tikang agud nga masolbar .
Bangud sa ginbo-oe ag gintambakan nga imburnal sa andang lugar hay indi eon maka-ilig it tayuyon ro tubi paeapos sa suba eabi eon sa tiempo it tig-ueuean rason nga nagatipon ro tubi.
