Manami nga balita, mag-euwas sa presenteng nababaton nga diskwento it mga senior citizens ag persons with disabilities (PWDs) sa mga physical stores ag iba pang pasilidad, nakataeana man nga magbaton ro mga raya it discounts ag exemption halin sa Value added tax (VAT) sa pagbakae it mga produkto online.
Sa gin-isyu nga joint memorandum circular nakabaehag nga entitled ro mga nasambit nga indibidwal sa 20% diskwento ag 12% VAT-exempt sa andang pagabak-eon nga goods and services ag 5% special discount para sa basic necessities ag prime commodities.
Kaibahan eon kara ro mga bueong ag medical supplies, home health care services, professional fees sa private hospitals, medical facilities, outpatient clinics, medical ag dental services, diagnostics ag laboratory fees, public transportation fare, services sa hotels, restaurants ag recreation centers maging sa mga teatro, cinema ag iba pa.
Kinahang-ean eamang nga i-declare it sangka indibidwal nga imaw hay PWD ukon senior citizen kung magabakae sa online platform ag mag-attach it kopya it andang ID bilang pamatuod.
