KALIBO, Aklan — Gintutukan it mga supporters ag Filipino community sa Estados Unidos ro ginpatigayon nga inagurasyon ni US President-elect Donald Trump.
Suno sa mag-asawang Tom ag Portia Moy, Bombo International News Correspondents sa Amerika nga bangud sa sobrang eamig it paniempo, nagpanumpa si Trump pinaagi sa sangka indoor inauguration ceremony samtang ro anang mga tagasuporta hay nagtililipon sa sueod it Capital One Arena agud nga mag-selebrar.
Bilang mga supporters ni Trump, nagaeaum sanda nga ro anang pagpungko sa ikaywang termino bilang pangueo hay maging daean agud nga maibalik ro manami nga daeagan it ekonomiya.
Sa inaugural speech, ginpromisa sigon ni Trump nga ro anang magiging pamana hay bilang sangka “peacemaker and unifier”.
Nagapati sanda nga para sa kamaeayran it Amerika ro pila sa anang mga ginplastar nga bag-ong polisiya nga igapatuman kapareho it hugut nga kampanya kontra sa irregular immigration ag ro pagbawi sa Panama Canal.
Kamana man ro pagdeklara it national emergency sa border it US-Mexico ag ro pagpadaea it mga tropa idtu.
Mayad man suno kana nga balita ro pahayag ni Trump nga magahimo imaw it mga nagakaigo nga tikang agud nga mapabaskog ro ekonomiya it nasyon kaibahan ro pagmandu sa mga miyembro it anang gabinete nga tun-an nga mapanaba ro record inflation ag panabaan ro mga gastos ag presyo.
