Nagpaandam si Presiding Officer Chiz Escudero sa mga testigo sa impeachment trial ni Vice President Sara Duterte angot sa mga posibleng penalidad nga pwedeng paga-atubangon engkaso nga magtau it saea nga testimonya.
Suno kay Escudero, posibleng magapangatubang sa kasong contempt ukon perjury ro mga testigong mapamatud-an nga nagapinuril ukon nagatau it bukon it matuod nga pahayag sa impeachment court.
Ginhimo ni Escudero ro paandam kasunod it mga naging komento angot sa pagbinatasan it defense witness nga si Davao City Assessor Jaime Adalin sa ginpatigayon nga pagpamati kahapon.
Kaibahan sa mga naging pangutana nga ginsabat ni Adalin hay ro owa imaw it matandaan nga mga detalye angot sa pagbiyahe nana sa China ko Enero 2025.
Nauna eon nga ginpahayag ni Escudero nga pwedeng magapangatubang sa contempt of court ro sin-o man nga testigong magatau it saea nga pahayag sa impeachment court.
Mag-eowas kara, pwede man sanda nga kasuhan it perjury sa taeatapan it piskalya ukon sa mga regular nga korte.
Ginpaathag ni Escudero, ro mga pahayag it mga testigo hay ginatau sa idaeum it pagpanumpa rason nga sakop ro mga raya it laye kontra sa perjury.
