Vatican City — Gin-anunsyo it Roman Catholic Church ro pagkamatay ni Pope Francis ko Abril 21, 2025. Ro proseso it pagpili it masunod nga Santo Papa hay magasunod sa mga ritwal nga gintukod it papal constitution nga ginatawag nga Universi Dominici Gregis.
Ro camerlengo nga presenteng si Cardinal Kevin Farrell ro magapanguna sa mga hilimuon it simbahan.
Ro Fisherman’s Ring ag lead seal it papa hay pagasamaron agud nga indi magamit it iba.
Makaangkon it siyam nga adlaw nga pagpangasubo matapos ro kamatayon it papa, ag ro eubong hay nakataeana sa ika-ap-at hasta sa ika-an-um nga adlaw pagkatapos it kamatayon.
Ro mga seremonya it eubong ni Pope Francis nga anang ginpa-simple ko 2024, hay pagaeakipan it sangka misa sa St. Peter’s Square, pag-eubong sa St. Mary Major Basilica, ag sangka simpleng kahon nga himo sa kahoy.
Ro mga kardinal halin sa bilog nga kalibutan hay magatililipon sa Roma para sa mga adlaw-adlaw nga pagpueong agud nga talakayon ro mga kina-iya it bag-ong papa.
Ro conclave hay pagahiwaton sa Sistine Chapel, ag ro mga kardinal hay magaboto daywang beses adlaw-adlaw.
Kinahangean ro two-thirds nga mayorya para sa eleksyon.
Kon napili eon ro bag-ong papa, ro anunsyo hay pagahimuon gamit ro puting asu halin sa chimney it kapilya, kasunod it sikat nga “Habemus Papam” nga pahayag.
Ro proseso hay sangka importanteng tradisyon, halin sa mga obligasyon it camerlengo hasta sa pagiging sekreto it conclave. Ro eleksyon it bag-ong papa hay sangka importanteng hitabu para sa Simbahan.
