Kalibo Aklan——–Nagaaray makaron ro mga tricycle drivers kasunod it mahina nga kita tuga it daywang ka pasahero eamang ro pwede nanda nga isakay kada trip.
Suno sa tricycle driver nga si Abril Fernandez nga may ruta Estancia to Kalibo vice versa, uwa it pilitan ro panuktan sa pamasahe apang gahinyo sigon sanda sa pasahero nga doblehon ro andang bayad agud makabawi manlang sa maskin gasolina nanda.
Kon huyapon sigon sa sueod it sang adlaw hay 200 pesos ro andang magastos sa gasolina kon sa siin maabo man sanda nga nagapila para magsakay it pasahero.
Malipayon eon sigon sanda kon may i-uli sa andang pamilya nga bugas ag suea.
Sa pihak kara, pabor sigon imaw sa proposisyon nga limitahan ro transportasyon sa banwa it Kalibo maskin ro kabaylo kara hay ro bukon it adlaw-adlaw nanda nga pagpamasada para sa kaeowasan it tanan.
Nasayuran nga bukon pa it eowas sa COVID-19 ro bilog nga probinsya it Aklan partikular ro banwa it Kalibo nga imaw ro sentro it komersyo.
Nataeopangdan nga halin kat ginpaidaeom sa General Community Quarantine ro bilog nga probinsya it Aklan hay mansig guwa ro tawo sa tagsa nanda ka panimaeay kon sa siin makit-an man ro paggutok it mga behikulo kamana man mga tawo nga nagapanindahan sa banwa it Kalibo.
