KALIBO, Aklan—Positibo ro naging pagbaton it mga turista sa pagbo-oe it hotel vouchers requirement para makasueod sa Isla it Boracay.
Raya hay base sa ginpirmahan nga Executive order 097 ni Governor Jose Enrique Miraflores nga may petsang Nobyembre 15, 2023.
Sa ginpatigayon nga 2nd Boracay-Caticlan Sustainable Development Council Meeting, ginkasugtanan it Aklan provincial government ag mga stakeholders nga haeugaan eon ro mga restrictions agud nga mas pang maka-engganyo it mga turistang magabakasyon sa isla eabi eon it mga dumueuong.
Gin-organisa ro nasambit nga pueong kasunod it mga reklamong nababaton halin sa mga bisita bangud sa kaabu sigon nga mga ginapangayo nga requirements.
Naistoryahan man ro pagnaba it numero it mga nagasueod nga foreign tourists sa Boracay.
Nasayuran nga ginpatuman ro nasambit nga mga restrictions ko tiempo it COVID-19 pandemic.
Samtang, ginpahayag ni Kathrine Licerio, assistant public information officer it Malay Tourism Office nga madali lang nanda maabot ro bag-ong projected tourist arrivals nga daywang milyon sa pagtapos it 2023.
Ko Nobyembre 8 hay naabot eon sigon nanda ro target nga 1.8 million tourists para sa Boracay.
Umpisa Enero hasta Nobyembre 26, nakalista eon it 1,921,130 nga turista.
Sa pihak nga parte, ginpasugtan eon man makaron ro pagbutang it mga beach beds ag payong sa front beach, ginpaeawig ro oras para sa night swimming it hasta alas-9:00 it gabi-i, ginsuspinde ro P20,000 fee para sa foreign tour guides ag ginaplantsa pa ro suhestiyon nga pag-angkon it unified ticket sa jetty port.
