BORACAY, Island — Ginduea it 1st Boracay Master Diver’s Association Inc. ro kabaeaka it mga turista sa uman nga pagtuhaw it eomot sa binit it baybayon it isla it Boracay.
Suno kay Louie Aron, supervisor it nasambit nga asosasyon, normal eamang ro pagtuhaw it mga eomot kapin eon kon nagahilapit ro summer season.
Ko 1980’s suno kana nga bukon pa it libo-libo ro mga turista nga nagapaligos kada adlaw sa baybayon hay mga isda ro nagakaon sa eomot ag madasig raya nga mag-eambo kapin eon kon bukon it mahumbak.
Sa makaron nga tyempo suno kana hay medyo bukon eon it balance ro ecosystem sa Boracay apang ginpasiguro kara nga nagapabilin nga malimpyo ag eowas nga paligsan ro baybayon.
Amat-amat eamang sigon nga maduea ro mga eomot apang magabuhay nga makit-an raya sa mga bi-bi it baybayon hasta sa buean it Mayo.
Gin-insister kara nga uwa it dapat kabaeak-an ro tanan bangud sa nagapabilin nga malimpyo ro Boracay ag ginakabig nga natural phenomenon ro pagtuhaw it mga eomot nga suno pa sa mga katigueangan hay raya ro nagamantini sa maputi ag pinong baeas nga ginabalik-balikan it mga turista sa isla.
