Kalibo Aklan ———-Uman nga nagpaguwa it Executive Order si Aklan Governor Florencio Miraflores nga nagatuyong i-extend ro pagpatuman it Modified General Community Quarantine (MGCQ) with heightened restrictions it daywa pang dominggo nga maga-umpisa makarun nga adlaw, June 22, 2021.
Suno kay Governor Miraflores nga may pilang ka mga pinagbag-o sa anang EO, apang ro ibang pagsinoeundan hay nagapabilin nga igapatuman.
Nasayuran nga sandig sa Executive Order No. 005-D, series of 2021 ni Aklan Governor Miraflores nga bawae eun ro pagdine-in sa mga restaurant ag iba pang food establishments sa Aklan.
Mag-euwas sa dine-in, bawae man ro mga outdoor ag indoor sports ukon venues para sa mga contact sports, fitness studious, gym, spa, beauty salon, beauty parlors, medical aesthetic clinics, cosmetic ukon derma clinics, libraries, museums, galleries ag mga cultural shows ag exhibits.
Nagapabilin man nga bawae ro pagbukas it mga karaoke bars, bars, club, concert halls, theater, cinemas ag mga recreational venues kapareho it mga internet cafes, billiard halls, amusement arcades, bowling alleys ag iba pa.
Samtang, ro mga hotels ukon accommodation establishments nga may valid DOT accreditation eamang ro pweding magbatun it mga guest.
Bawae man nga magguwa ro naga edad 18 panaba ag 65 pataas kamana man ro mga may ginaangkon nga immunodeficiency, comorbidity individuals maging ro mga nabdos.
Samtang, ginpasugtan man nga magguwa ro mga essential goods, essential services ag may health ukon medical reasons.
Ginapahayag dugang nga nabilog ro nasambitan nga desisyon bangud sa padayun nga pagtinaas it kaso it COVID-19 sa probinsiya it Aklan.
Madumduman nga ko nagtaliwan nga dominggo hay nakalista it 100 ka mga kaso it nasambitan nga sakit ro probinsya ag raya ro ginakabig nga unang beses nga humampak sa masobra 100 ro nailistang active cases sa Aklan sa sueod it sang adlaw umpisa nga nag-eupok ro pandemya.
