KALIBO, Aklan — Nagpa-andam makaron ro Municipal Health Office (MHO) Kalibo sa pag-abo it mga masakit makaron nga tiempo it tag-init.
Sa interview it Bombo Radyo Kalibo kay MHO-Kalibo Officer Dr. Maria Magpusao, kinahang-ean nga ro kada isaea hay magdoble haeong makaron nga tiempo.
Ginpahayag kara nga “prevention id better than cure”.
Mas makamayad sigon nga abangan eagi naton ro mga masakit kaysa sa estado eon kita it pagbueong.
Indi gid malikawan suno sa doktora nga magtueuhaw ro masakit nga uso kada tag-init eabi eon sa mga inunga makaron nga bakasyon.
Ro masami suno kana nga mga masakit kung tiempo it tig-ilinit hay ro ubo ag sip-on, trangkaso, tigdas, bulotong-tubig, dengue ag ro pagtatae.
Raya nga mga masakit hay sarang naton nga malikawan kung magiging malimpyo ag mahaeong kita sa atong mga ikaayong-eawas.
Kung ginatrangkaso suno kay Magpusao hay likawan anay nga mag-iba sa maabong tawo ukon sa ibang miembro it pamilya agod nga indi magkalat do virus.
Pwede sigon nga maggamit it mask bangod raya nga masakit hay air-borned.
Agod nga malikawan man ro pagtatae hay siguraduhon nga malimpyo ro ginakaon ag tubi nga gina-inom.
Nagpa-andam man si Dr. Magpusao sa mga mahilig sa street foods nga siguraduhon nga naeaha nga mayad ro mga ginabakae nga pagkaon.
