KALIBO, Aklan—Kadungan it State of the Nation Address (SONA) ni Pangueong Rodrigo Duterte makaron nga adlaw it Lunes, Hulyo 22, 2019, magapatigayon man it hub-eag protesta ro mga progresibong grupo sa probinsya it Aklan.
Raya hay pagapasakupan it Bayan Muna-Aklan, Gabriela, Panguma, Pamalakaya ag Rise Up-Aklan.
Suno kay Aklan Rise-Up spokesperson Kim Sin Tugna, katuyuan kara nga sukton ro presidente sa anang mga ginpromisa sa katawuhan nga sa sueod it tatlong dag-on hay uwa it natuman.
Ginpunto it nasambitang grupo ro nagapadayon nga korapsyon sa nagkaeain-eain nga ahensya it gobyerno sa idaeom it anang pagdumaeahan, ro gutom nga padayon nga ginabatyag it mga kubos nga ginpalala it Rice Tarrification Law ag ro end of contractualization ukon Endo nga uwa it katapusan nga ginapakigsukoe it mga trabahador.
Samtang, gusto man mabatian it grupo ro panindugan it presidente sa isyu sa West Philippine Sea partikular ro Recto Bank incident matapos nga matsa nagapabor ro presidente sa ginsumite nga report kana nga aksidente eamang ro natabo sa tunga it chinesse vessel ag baroto it 22 ka mga mangingisdang pinoy.
Kinahang-ean eon suno kanda nga kwestyunon ro development nga ginahimo it China sa ginaagawang teritoryo.
Sa pihak nga parte, sigurado suno kanda nga igabida it pangueo ro pag-umwad it ekonomiya, pagtapna sa illegal nga droga ag ro pagkriar it maabong trabaho.
Apang, maskin anu pa ro igapabugae ni Duterte sa anang unang tatlong dag-on nga pagpungko sa pwesto, nagapabilin gihapon sa manaba nga lebel ro pagpangabuhi it mga pumueoyo bangud sa kaimueon.
