Kalibo Aklan —– Naging madasig ro aksyon it Ministry it Vietnam rason nga uwa eon nagkalhit ro 2019 coronavirus disease (COVID-19).
Suno kay Bombo International Correspondent Ira Patricio, sangka public teacher sa Ho Chi Minh City, Vietnam nga nagpangibabaw ro gahom it gobyerno sa pagpatuman it mga polisiya sa mga pumueoyo.
Ro unang kumpirmadong kaso it COVID-19 sa nasyon hay nailista ko Enero 23 ag halin kato hay ginlockdown ro bilog nga nasyon.
Strikto sigon nga ginpatuman ro social distancing partikular kon nagapamaeak-eon, uwa it social activities, kanselado ro mga klase, nagsarado ro mga kumpanya mag-eowas eon lang sa mga nagabaligya it essential goods ag pharmacy kamana man ginlimitahan ro transportation.
Apang sa pihak kara, uwa it gutom nga natabo sa lugar matapos nga nagprovide it rice dispenser sa mga pampublikong lugar ro gobyerno.
Ro mga uwa it bugas hay pwede makasaeod it hasta sa daywang kilo kada adlaw.
Ginpahayag dugang ni Patricio nga may una man nga mga pasaway kon sa siin ginpamulta ro mga raya it gobyerno.
Sa makaron sigon hay amat-amat eon nga nagabalik sa normal ro sitwasyon sa nasyon bangud sa kaabtik it gobyerno partikular ro mga health authorities sa pagtapna it makamaeatay nga virus.
Sa kabilugan, ro Vietnam hay nakalista eamang it 270 nga kaso it COVID-19 kon sa siin 219 sa mga raya ro nakarekober eon matapos ro pagbueong ag quarantine period.
