POLICE Report — Gin-aresto ro sangka hilong nga pulis matapos sigon kara nga barilon ag sakiton ro anang asawa sa Barangay Ayungon, Valladolid, Negros Occidental.
Suno sa imbestigasyon, nakabakasyon ro 33-anyos nga suspek nga naka-assign sa Malay Municipal Police Station sa Aklan matapos nga mag-unga ro anang asawa sa andang ikatlong unga.
Matapos makipag-inuman sa anang biyenan, nagsueod ro suspek sa andang kwarto bago magtungang gabi-i, ginbo-oe ro anang 9mm Glock 17 service firearm, ag ginbaril ro asawa nga tinamaan sa anang tuo nga ibabaw it abaga.
Nagpangayo it bulig ro biktima nga sangka manugturo sa elementarya, sa anang mga igbata nga insigida man nga nag-report sa kapulisan.
Naaresto ro suspek sa andang baeay ag narekober ro baril ag sangka basiwo it bala.
Presenteng nagapamayad sa ospital ro biktima.
Owa sigon it may gin-awayan ro mag-asawa antes ro insidente ag nagahinoesoe ro suspek sa anang nahimo.
Nagapangatubang imaw sa kasong frustrated parricide ag pageabag sa Republic Act 9262 ukon Anti-Violence Against Women and Their Children Act of 2004.
