KALIBO, Aklan–Presenteng nagapatigayun it mga serye it flushing activity ro Metro Kalibo Water District ukon MKWD sa pilang ka mga area it Kalibo, Banga, Balete ag New Washington umpisa Pebrero 27 hasta Marso 5.
Suno kay Frederick Buenavidez, tagapaghambae it MKWD nga tuyo kara nga malimpyuhan ro linya ag masigurong euwas ro tubi nga ginagamit it mga miyembro-konsumidor.
Gin-abisuhan man kara ro mga pumueoyo nga apektado it flushing activity angot sa posibleng ma-ekperyensyahan nga temporaryong paghigko ukon pagkaduea it supply it tubi.
Masami sigon nanda raya nga ginapatigayun kada hapon kung siin tapos eon nga magkaon ag maghikot ro mga konsumidor.
Kadungan kara, nagpangayo man imaw it pagpasaylo ag pag-intindi sa mga pumueoyo bangud sa sangkiri nga disturbong maituga it andang flushing activity.
