Kalibo Aklan ——–Ginklaru it Metro Kalibo Water District (MKWD) nga owa sanda nagpatuman it penalty ag disconnection sa mga owa nakabayad it water bills nga haeos tatlong buean nga natipon bangud sa ginpatuman nga community quarantine sa probinsiya it Aklan tuga it coronavirus disease (COVID-19) pandemic.
Sa pag-atubang ni Engr. Lydio Ureta, Acting General Manager it MKWD sa ginapatigayon nga imbestigasyon it Sangguniang Panlalawigan nga ginpangunahan it Committee on Energy and Public Utilities ag Committee on Trade and Industries angot sa pilang reklamo sa nasambit nga water concessionaire, ginpamilit kara nga bilang pagtau it konsiderasyon, owa eon sanda nagsukot it penalty sa mga owa eagi nakabayad it andang water bill umpisa Abril hasta Mayo ag ginsuspinde man ro disconnection it water service umpisa marso hasta Mayo .
Ginpahayag dugang nga owa man nagsukot ro MKWD it water bill sa mga establisimento komersiyal nga may zero consumption kasunod it andang pagsarado ko tiempo it ECQ ag GCQ .
Sa pihak nga parte, ginpaathag pa nga sangkiri nga nagtaas ro rate it water bill sa banwa it Balete bangud sa leakage ag nagtaas nga numero it mga konsumidor .
Samtang, ginpahayag ni Board Member Nemesio Neron nga owa man it masyadong “bills shock” sa MKWD kumpara sa Aklan Electric Cooperative (AKELCO) kuntento man sigon sanda sa andang naging explinasyon, apang uman sanda nga ginpadumdum angot sa andang owa pa nasumite nga periodic report sa SP sa ginpatigayon nga legislative inquiry ko nagtaliwan nga dag-on may kaangtanan sa ginareklamo kato nga discoloration ukon maeubog ag mahina nga water supply.
Ginpahayag ni Neron nga dapat nanda raya nga i-comply agud nga mabutangan it tuldok ukon conclusion ro andang ginhimo nga imbestigasyon.
