KALIBO, Aklan—Nagapati ro sangka health expert nga epektibo ro paggamit it Wolbachia bacteria agud nga mabawasan ro pagkalhit it dengue sa Pilipinas.
Ginpaathag ni Dr. Philip Ian Padilla, professor of microbiology sa UP Visayas ag sangka health expert nga ro nasambit nga pamaagi hay ginagamit eon sa Indonesia ag iba pang nasyon.
May bacteria suno kana nga ginabutang sa female mosquito agud nga makontrol ro pag-abu it mga namok ag ginapapundo ro transmission ukon pagsaylo it virus sa mga tawo partikular ro dengue.
Ginpahayag dugang nga ro Wolbachia hay sangka ordinaryong bacteria nga nagapugong sa pagbahoe it mga virus kapareho it dengue, chikungunya, ag zika sa eawas it mga aedes aegypti mosquitoes.
Dikara hay nagapalahi sanda it mga namok nga may Wolbachia ag ginabuhian sa mga lugar nga apektado it mga sakit nga daea it lamok agud nga mabawasan ro peligro it sakit sa mga komunidad.
Dugang pa ni Dr. Padilla nga mag-eowas sa Wolbachia Program, ginahueat man makaron it gobyerno ro resulta it aplikasyon para sa Certificate of Product Registration it Japanese drug company nga Takeda para sa ikaywang henerasyong bakuna kontra sa dengue sa Pilipinas.
Madumduman nga sa makaron hay amat-amat eon man nga nagatinaas ro kaso it dengue sa Pilipinas partikular sa Calabarzon, Central Luzon ag Metro Manila.
