VENTURANZA, Banga – Gindumdom pa it asawa ni Rommer Salvador De Juan ro eaeaki nga ginbaril-patay sa may bahin it Brgy. Venturanza, Banga ku Agosto 7 ro mga senaryo antes nga raya hay binaril.
Pahayag ni Cristy Mae De Juan nga nakaduty pa ro anang asawa sa motor shop nanda ag malipayon pa nga nakapamakae para sa andang mga unga antes nga raya hay hibaril it mga uwa pa nakilaea nga mga suspek.
Tinamaan sigon raya sa anang tiyan, apisar karun raya hay nakapanaog pa halin sa anang ginamaneho nga trysikol apang natumba ag insigida nga binaril it uman it kun siin nagresulta sa ginabuebanta nga ap-at nga tama sa euo, dughan ag paa.
Gintutukan man sigon pati imaw it baril ngani nga eubos man ro nerbyos nga anang binatyag.
Pagsaysay nga nakasuksok it itom nga jacket ro suspek, maniwang eamang ag nakatabon gid sigon ro bilog nga itsura eakip ro driver.
Ulihi eamang sigon nana nasayuran nga nakasunod kanda ro mga suspek.
Pamilit man ni Cristy nga uwa gid it naiistorya ro anang asawa nga nakaeainan it buot sa andang lugar ukon sa shop man.
Blangko ag kwestiyonable ro rason ag motibo sa pihak ku pagbaril sa anang mister.
