KALIBO, AKLAN — Patay ro sangka eaeaki samtang naga-motorsiklo matapos nga mahueogan it niyog ro ueo sa national highway it Brgy. Agbago, Ibajay.
Ginkilaea ro biktimang si Requiro Manong, 48, residente it Brgy. Tagbaya it nasambitang banwa ag onga ni Gloria Manong nga sangka kilaeang negosyante sa lugar.
Suno kay PO2 Ian Sastre it Ibajay PNP station nga natabo ro insidente samtang nagapauli ro biktima.
Nag-agi sigon ro biktima samtang nagabueo it niyog ro sangka alyas Lupin nga residente it Sebaste, Antique ag aksidente rayang nahueogan sa ueo.
Bangud sa kabaskugon it pagkahueog, nakaangkon raya it nina sa anang dahi ag nagbuslo ro daywang ka mga mata kara nga insigidang gindaea sa Ibajay District Hospital, apang namatay samtang ginabueong.
Nagapadayon ro pagtugis it kapulisan kay alyas Lupin nga insigidang nagpaeagyo matapos ro insidente.
