KALIBO, Aklan–Namatay samtang ginabueong sa Aklan Provincial Hospital ro sangka motorcycle rider matapos ro natabo nga banggaan sa kaparehong motorista bandang alas-7:30 kabi-i sa Brgy. Banay-banay, Malinao.
Nakilaea ro biktima nga si Victorino Ibutnande, 38-anyos samtang ro nakabanggaan kara hay ro magmaeanghod nga sanday Cris Villaristo, 25-anyos ag Maria Helen Joy Villaristo, parehong mga residente it Brgy. Liluan sa nasambit nga banwa.
Suno kay Police Lieutenant Gelbert Batiles, hepe it Malinao Municipal Police Station nga ro daywang motorsiklo hay paadto sa magkaseparado nga direksyon apang pag-abot sa black spot aea hay aksidente sanda nga nagbanggaan.
Posible sigon nga owa nanda napan-uhan ro pag-abot it kada isaea.
Bangud sa mabaskog nga impact it pagkabangga hay inapok si Ibutnande halin sa anang motorsiklo.
Gilayon man nga nagresponde ro Malinao PNP ag parehong gindaea sa ospital ro mga biktima.
Apang, samtang ginabueong hay namatay si Ibutnande.
Nasayuran nga owa it suksok nga helmet ro biktima ag una sa idaeom it impluwensya it makahieilong nga ilimnon.
Ro motorsiklo it magtimbang nga parte hay temporaryong ginkostudiya sa Malinao Municipal Police Station.
