KALIBO, Aklan—Ginatugyan it Municipal Social Welfare and Development Office (MSWDO)-Banga sa Department of Social Welfare and Development (DSWD) regional office 6 ro pagsabat sa mga pangutana angot sa delayed nga pay-out it social pension it mga senior citizens sa nasambit nga banwa.
Suno kay MSWDO officer Norberto Seraspi nga maskin sanda hay indi makasabat sa mga reklamo kon hin-uno mabaton ro katunga nga P3,000 nga pension ag ham-an nga ro ap-at nga barangay sa Banga nga ginaeakipan it Ugsod, Bacan, Daja Sur ag Norte hay owa pa nakabaton it P6,000 nga pension.
Sa makaron hay direktang ro regional office it DSWD ro in-charge sa pag-release it nasambit nga pay-out ag owa eon ginapa-agi sa lokal nga gobyerno.
Gindugang pa ni Seraspi nga nagpaguwa it memorandum ro regional office nga ro anuman nga pangutana angot sa pay-out it social pension sa mga lolo ag lola hay kanda direktang magpangutana.
Ko buean it Setyembre ulihing nakapatigayon it pag-release it nasambit nga pension sa nasambit nga banwa.
Nagapati man ro opisyal nga angay ag bagay nga itau sa mga beneficiaries ro nasambit nga kantidad.
Nasayuran nga ro ginpatigayon nga validation agud nga malimpyuhan ro listahan it mga beneficiaries sa idaeum it social pension program it gobyerno hay nagtuga it delay sa pag-release it P6,000 ukon P500 kada buean nga pension para sa mga senior citizens agud nga makabulig sa adlaw adlaw nga kinahang-eanon ag pangbakae it bueong.
