Nagapabilin nga mabaskog apang komplikado ro kondisyon ni Pope Francis matapos ro sangka bronchial crisis nga nagresulta it pagsuka ag inhalation.
Raya ro ginpahayag ni Bombo International Correspondent Girlie Ongoco it Rome, Italy angot sa ulihing health condition it 88-anyos nga Santo Papa.
Ginpamalibaran man ni Ongoco ro balita nga nakaguwa eon raya sa Gemelli Hospital kon sa siin imaw presenteng ginabueong.
Nagapabilin nga una sa maayos ro response ni Pope Francis sa non-invasive mechanical ventilation, alerto ag may alintro.
Madumduman nga nakaangkon imaw it double pneumonia ag bronchitis, kon sa siin daywang dominggo eon imaw idto sa Gemelli Hospital sa Roma.
Samtang, padayon ro ginapatigayon nga pagpangamuyo para sa ikamayad nga eawas it Santo Papa sa St. Peter’s Square, sa pagpanguna it Argentine Cardinal Victor Manuel Fernández.
