KALIBO, Aklan—Nagapadayun ro pagbo-oe it swab specimens sa mga repatriated overseas Filipino workers ukon OFWs nga presenteng nagatinir sa mga gintaeana nga quarantine facilities.
Raya hay sa pihak it advisory nga ginpaguwa it Western Visayas Medical Center (WVMC), sub-national laboratory sa Iloilo City nga temporaryo nga ginpundo ro andang operasyon matapos nga makaangkon it kasamaran ro andang laboratoryo bangud sa nasamad nga exhaust it negative pressure room.
Suno kay Provincial Health Officer I Dr. Cornelio Cuachon, Jr. nga ro masobra sa 151 nga swab specimens ro andang ginpadaea sa WVMC para sa confirmatory tests it reverse transcription-polymerase chain reaction (RT-PCR).
May schedule suno kana sanda nga ginasunod sa pagbo-oe it swab specimens ag pagpadaea kara sa WVMC.
Ginpaathag pa ni Dr. Cuatchon nga sa idaeum it bag-ong protocol, ro mga returning land based ukon sea-based OFWs hay kinahangean nga magpaidaeum sa mandatory nga 14-days quarantine sa mga gintaeana nga hotel facility ukon Ligtas Covid Center para sa hugut nga monitoring.
Engkaso nga maging negative sa coronavirus, pagapasugtan sanda nga mag uli sa andang baeay para sa pag kompleto sa daywang domingo nga strict isolation.
Samtang, ginpaathag pa ni Dr. Cuatchon nga posibleng nagdueueungan ro pag-abot it mga OFWs rason nga pila sa mga raya hay nagtililipon sa sangka kwarto , apang ro ideal kara hay “one is to one”.
