Mahugot nga ginpamalibaran ni SB member Jerome Vega it Numancia nga drama eamang ro nagtuhaw nga pagpamaril sa anang baea ku nagtaliwan nga Mayo 19.
Suno kana, indi nana kayang ubrahon raya bangud kabuhi man it anang pamilya ro mabutang sa aeang-aeang. Makasueubo sigon nga ginapyestahan pa it mga tawong may maeain nga pag-huna-huna ro nasambit nga insidente.
Dugang pa kara nga kumpirmado man sigon it mga katapo it kapulisan ro nagtuhaw nga pagpamaril ag sa makaron hay may gina-tan’aw eon nga person of interest.
Nagasalig man si SB Vega nga uwa nagapahuway ro kapulisyahan sa pagpatigayon it maid-id nga imbestigasyon sa natabo nga pagpamaril sa anang panimaeay kun sa siin ginpahayag man nana ro anang kabaeaka para sa mga Numanciahanon nga posibleng maging biktima man it nasambit nga hilimuon.
Sa makaron, nagapadayon pa ro pag-imbestiga it Numancia MPS sa nasambit nga insidente.
Padayon man nga nagapangamuyo si SB Member Vega para sa seguridad it anang kaugalingon, pamilya ag pati eon man it mga myembro it Sangguniang Bayan it nasmabit nga lugar.
Ginpasaeamatan man nana ro ibang opisyales it andang banwa sa mahugot nga pagkondena sa nasambit nga pagpang-atake.
