MAKATO, Aklan—Ginadudahan nga naghalin sa sangka napabay-an nga kandila nga gingamit sa pista minatay ro naging rason it pagkasunog it sangka panimaeay pasado alas-6 it gabi-i it Biyernes, Nobyembre 1 sa Brgy. Cabatanga, Makato.
Suno kay FO2 Augie Perlas it Bureau of Fire Protection ukon BFP-Makato nga padayun pa ro andang ginahimo nga imbestigasyon sa ginhalinan it kaeayo, apang owa nanda ginaduea ro nasambit nga anggulo.
Base sa andang follow-up investigation, natukiban nga ro kaeayo hay nag-umpisa sa sala it baeay nga nagpaugdaw sa haeos bilog nga panimaeay nga himo sa concrete materials.
Nasayuran nga ro andang nakaseparar nga kusina ukon dirty kitchen ro owa naabot it kaeayo.
Bangud sa mapiot nga fediroad hay napas-eawan sigon ro andang firetruck nga makasueod sa lugar.
Pag-abot nanda hay haeos under control eon ro kaeayo bangud sa nagbueuligan ro mga pumueuyu pinaagi sa bucket brigade.
Owa sigon it anuman nga nasalbar nga kagamitan bangud nga owa it tawo sa baeay kat matabu ro sunog .
Ginaboeobanta nga 480,000 pesos ro danyos sa natabu nga sunog.
