KALIBO, Aklan—Bukas ro grupo nga NAPOCACIA nga ipaguwa ro mga heavy equipment it Pacific construction para sa andang maintenance.
Raya hay kasunod sa tikang nga ginhimo it construction company nga ginpasakaan it kaso ro mga naghold sa andang kagamitan sa sueod it haeos ap-at nga buean.
Suno sa lider it grupo nga si German Baltazar, nagpatunga kanda si Aklan first district board member Nemesio Neron ag nakipagnegosasyon para mataw-an it solusyon ro andang ginapaninggitan nga problema.
Sa sueod it haeos ap-at nga buean hay ginbantayan nanda ro lugar agud nga inde makatrabaho ro Pacific construction sa Kalibo International Airport Expansion project.
Ginpahayag dugang ni Baltazar nga ginhold nanda ro mga kagamitan agud nga inde makapadayon sa pagtrabaho ro construction company bangud nga uwa pa na-settle ro mga kasugtanan sa tunga it nasambit nga grupo ag Department of Transportation.
Bangud kara, sa adlaw it Lunes hay magaistorya ro magtimbang nga parte kon anu ro mga nagakadapat nga himuon nga makabenepisyo ro daywang kampo.
Ro NAPOCACIA hay ginabilog it mga barangay it Nalook, Pook, Caano ag Estancia.
