KALIBO, Aklan — Ginkumpirma ni dating Aklan 1st District Congressman Carlito Marquez nga may nakita imaw nga iregularidad sa gintau kana nga kopya kato it National Expenditure Program ukon listahan it mga flood control project ag iba pang infrastructure program para sa anang distrito.
Suno kana nga nakaangkon it dagdag-bawas bangud nga may mga item nga ginsingit ag may mga naduea sa mga gin-proponer nga proyekto it Department of Public Works and Highways (DPWH) para sa Aklan.
Kaibahan sa naduea sa listahan ro Altavas bypass road nga masyadong importante suno kana bangud nga haeos lubak-lubak eon ag makabig nga makahueuya ro karsada bangud nga nagapanguna raya nga gina agyan it mga turista paagto sa isla it Boracay.
Bangud kara, ginhinyu sigon nana sa DPWH District Engineering Office it Aklan nga i-request it uman ro nasambit nga proyekto.
Samtang, ginklaru man nana nga ro proponent ukon ro naga-preparar it masterlist it mga proyekto hay ro DPWH ag bukon it sanda nga mga mamalidha.
Madumduman nga ginpuna ni Senate President Pro Tempore Panfilo “Ping” Lacson ko Martes sa ginpatigayon nga hearing it Senate Blue Ribbon Committee angot sa maanomalyang flood control projects ro “Leadership Fund” ukon insertions it DPWH nga suno kana hay nagatau it daean sa mga mamalidha nga doktoron ro National Expenditure Program ukon budget proposal it mga proyekto sa nasyon .
