KALIBO, Aklan—Uman nga ginbo-oe it lokal nga gobyerno it Aklan bilang sambilog sa mga requirements ro negatibong RT-PCR test result para sa mga magabakasyon sa isla it Boracay.
Suno kay Malay Tourism Officer Felix Delos Santos nga base sa Executive Order no. 001-A nga ginpaguwa ni Aklan Governor Florencio Miraflores, epektibo kahapon nga adlaw it Martes, Pebrero 1, indi eon kinahangean nga magpakita it negative RT-PCR test result sa mga magasueod sa isla para sa mga fully vaccinated nga turista.
Kinahangean eamang nga magbo-oe it QR code pinaagi sa pagpa-rehistro it Online Health Declaration Card sa Malay Municipal Tourism Office website sa touristboracay.com ag magdaea it vaccination card nga may QR code ag contact details halin sa vaccination center ukon certificate halin vaxcert.doh.gov.ph.
Rekisito man ro pre-booked accommodation sa DOT accredited establishment.
Para sa mga bukon it bakunado ag naka-unang dose pa eamang it bakuna, kinahangean sa gihapon ro negative RT-PCR test result 72 oras antes ro pagbiyahe pa-Boracay.
Exempted kara ro mga naga-edad it 11 anyos panaba.
Madumduman nga uman nga naging requirement ro negatibong RT-PCR test result sa tanan nga mga turista nga magasueod sa Boracay mag-eowas sa mga akeanon ko enero 9, 2022 matapos nga ipaidaeaum ro Aklan sa Alert Level 3 ag National Capital Region ukon NCR kasunod it uman nga pagtaas it kaso it COVID 19 sa bilog nga probinsiya.
Sa pihak nga parte, ginpasiguro ni Delos Santos nga syento porsiyento eon sanda nga preparado sa pagbaton it mga bisita eabi eon it mga foreign tourist pinaagi sa nakaplastar nga tourism management plan, tourism crisis management plan ag tourism recovery and resiliency plan.
Ginaeauman ag ginapangamuyo sigon nanda nga magbalik ro tourist arrivals sa pre-pandemic level nga 8,000 hasta 10,000 per day sa pagbalik it mga dumueuong nga bisita halin sa non-visa countries.
Ro tourist arrivals umpisa Enero 1 hasta 31 hay nag abot sa 35,799 samtang makaron nga Pebrero 1 ag 2 hay 718.
Ginkilaea man makaron ro Boracay bilang 2nd instagrammble sa bilog nga kalibutan.
