Kalibo Aklan ——–Ginkumpirma ni Kalibo Mayor Emerson Lachica nga pagaduea-on eon ro negatibong Resulta it Real-time Reverse Transcription Polymerase Chain Reaction (RT-PCR) test bilang sambilog sa mga requirements sa mga naga-uli nga Local Stranded Individuals (LSI’s) sa probinsiya it Aklan.
Raya suno kana ro sambilog sa mga gintalakay sa ginpatawag nga pueong it Provincial Inter-agency Task Force kaibahan ro mga miyembro it League of the Municipalities of the Philippines (LMP-Aklan) chapter.
Raya hay bilang pagsunod sa bag-ong advisory nga ginpaguwa it Department of the Interior and Local Government (DILG).
Gindugang pa ni Mayor Lachica nga pareho man gihapon ro mga protocol ag documentarty requirements kapareho it medical clearance certificate ag travel authority.
Basta nga makapasar sa standard nga gintaeana it Department of Health (DOH) ro paga-uli-an nga baeay it sangka LSI hay pasugtan raya nga magpaidaeum sa strict home quarantine ,apang kon indi hay igabutang raya sa quarantine facility it sangka banwa.
Matapos nga makapaguwa it bag-ong Executive Order si Aklan Governor Florencio Miraflores hay magiging epektibo ro mandu , kun sa siin pagataw-an kara it kopya ro mga shipping ag airline companies.
